ខេត្តសៀមរាប ៖ សមត្ថកិច្ចស្រុកជីក្រែងបានឱ្យដឹងថា មនុស្សស្រី-ប្រុសពីរនាក់បងប្អូន ដែរជាម្ចាស់ចំការឈូកមួយនៅតំបន់មាត់បឹងទន្លេសាបត្រូវបានជនមិនស្គាល់អត្ដសញ្ញាណមួយក្រុមធ្វើសកម្មភាពវាយសំពងនឹងអាករសម្លាប់យ៉ាងឃោរឃៅបំផុតមុននឹងដុតខ្ទមចោល ។ អំពើឃាតកម្មដ៏ព្រៃផ្សៃនេះបានកើតឡើងកាលពីវេលាម៉ោងប្រមាណ១០យប់ថ្ងៃទី ១២ កុម្ភៈ ខណៈជនរងគ្រោះទាំងពីរនាក់បងប្អូន កំពុងដេកនៅក្នុងខ្ទមចាំចំការឈូករបស់ខ្លួននៅចំណុចត្រពាំងដងរែក ស្ថិតភូមិចែកខ្សាច់ ក្រោម ឃុំអន្លង់សំណ ស្រុកជីក្រែង។
ទាក់ទិនទៅនឹងអំពើមនុស្សឃាតនេះលោកអនុសេនីយ៍ឯក ន ភ័ស្ដ មេបញ្ជាការរងកងរាជអាវុធហត្ថស្រុកជីក្រែងបានថ្លែងប្រាប់កាលពីព្រឹកថ្ងៃទី១៤ កុម្ភៈ ថា ករណីនេះ សមត្ថកិច្ចបានសន្និដ្ឋានជំហានដំបូងថាជារឿងគំនុំក្នុងការនេសាទត្រី ហើយឃាតករអាចមានគ្នាចាប់ពី២នាក់ឡើងទៅទើបអាចធ្វើសកមម្មភាពដ៍សាហាវបែបនេះបាន ។
លោកបានបញ្ចាក់ថា ជនរងគ្រោះស្លាប់បាត់បង់ជីវិតទាំងពីរនាក់បងប្អូនគឺបុរសជាបងឈ្មោះឈៀង សុខ អាយុ៣១ឆ្នាំ និងប្អូនស្រីឈ្មោះឈៀង ជា អាយុ១៨ឆ្នាំ ត្រូវបានក្រុមឃាតករវាយនឹងដំបងរួចអាកសម្លាប់បណ្ដាលឱ្យរយះនឹងជាំយ៉ាងដំណំ ព្រមទាំងមានឈាមប្រឡាក់ជោកជាំផងដែរ ។
លោកបានបញ្ចាក់ថា «ក្រុមឃាតករទំនងជាមានគំនុំជាមួយបង-ប្អូន ជនរងគ្រោះទាំងពីរនាក់នោះកាលពីមុន ទើបនៅយប់នោះពួកគេបានរៀបចំគម្រោងការសម្លាប់រួចដុតខ្ទមនោះចោលដោយបានបន្សល់ទុកនូវវត្ថុតាងធ្វើសកម្មភាពមួយចំនួនរួមមានដំបង ឈើ ច្រវ៉ាក់ ផងដែរ»។
ចំណែកលោកអនុសេនីយ៍ឯ សុខ សុទ្ធាវុធ អធិការរងនគរបាលស្រុកជីក្រែងទទួលបន្ទុកព្រហ្មទណ្ឌបានថ្លែងថា នេះជាអំពើឃាតកម្មដ៏យង់ឃ្នងដែលពុំធ្លាប់កើតមាននៅក្នុងមូលដ្ឋាន ក្នុងរយៈពេលច្រើនឆ្នាំចុងក្រោយនេះ ។
លោកបានបន្ថែមថា សកម្មភាពនេះបង្កឡើងដោយមនុស្សជាក្រុមដើម្បីសម្លាប់ជនរង គ្រោះឱ្យខានតែបាន ដោយក្នុងនោះមិនមែនជាអំពើប្លន់ ឬរំលោភសេពសន្ថវៈនោះទេ ។ លោកបានបន្ថែមថា ថ្វីបើយើងនៅមិនទាន់បានកំណត់មុខសញ្ញាក្រុមជនដៃដល់ក៏ដោយ ក៏ពេលនេះសមត្ថកិច្ចបានកំពុងប្រឹងប្រែងស៊ើបអង្កេតប្រកបដោយការទទួលខុសត្រូវ ដើម្បីតាមប្រមាញ់បក្សពួកឃាតករទាំងនោះយកមកផ្ដន្ទាទោសតាមច្បាប់ឱ្យខានតែបាន ។
ក្រុមអ្នកតាមដានពីបញ្ហាសង្គមបានលើកឡើងថា បច្ចុប្បន្នមនុស្សមួយចំនួនកំពុងតែបោះបង់ចោលនូវការសន្សំកុសល ហើយបែរជាប្រព្រឹត្តនូវអំពោះបាបកម្មទៅវិញ ។ ការលើក ឡើងបែបនេះខណៈសង្កេតឃើញអំពើកាប់សម្លាប់ លួច ឆក់ ប្លន់ បានកើតឡើងជាច្រើនករណីនៅលើទឹកដីប្រវត្តិសាស្ត្រនារយៈពេលប៉ុន្មានឆ្នាំចុងក្រោយនេះ ។ ចាប់តាំងពីឆ្នាំ២០១១ រហូតមកមានអំពើឃាតកម្មដោយឃោរឃៅធំៗជាច្រើនករណីនៅខេត្តសៀមរាបជាស្តែងករណីសម្លាប់ដោយអាក និងរំលោភទៅលើក្រុមស្ត្រី៣ករណីមានលក់គ្រឿងទេស នៅខាងក្រោយសាលារៀនស្វាយក្នុងភូមិវត្តស្វាយ សង្កាត់សាលាកំរើក ។ សម្លាប់និស្សិតស្រីនៃសាកលវិទ្យាល័យបៀលប្រាយ និងទី៣ករណីឃាតកម្មដោយវាយដំអាក រំលោភទៅលើក្រុមគ្រួសារស្ត្រីមេម៉ាយថៅកែសិប្បកម្មផលិតទឹកបរិសុទ្ធយីហោ«ប៉ៃលិន»នៅភូមិចុងកៅស៊ូ សង្កាត់ស្លក្រាម ក្រុងសៀមរាប ។ ដោយឡែកនៅក្នុងរយៈពេលជាងមួយខែចុងក្រោយក្នុងឆ្នាំ២០១២នេះគេឃើញមានអំពើឃាតកម្មយ៉ាងតិច៣ករណីដែរ បានកើតឡើងនៅលើទឹកដីខេត្តប៉ូលនៃវិស័យទេសចរណ៍មួយនេះ ជាក់ស្តែងកាលពីអំឡុងខែឧសភាកន្លងទៅស្ត្រីម្នាក់ត្រូវបានឃាតកររឹកករួចរំលោភនៅស្រុកសូទ្រនិគមន៍ ។ នៅថ្ងៃទី៣១ ឧសភា ស្ត្រីបម្រើការនៅក្លិបរាត្រីកោណម្នាក់ក៏ត្រូវបានឃាតករសម្លាប់ដោយរឹកកនឹងខ្សែក្រវាត់នៅក្នុងបន្ទប់ជួលក្នុងសង្កាត់ស្វាយដង្គំ និងការប្រទះឃើញសពបុរសមិនស្គាល់អត្តសញ្ញាណម្នាក់ហើយស្អុយអណ្តែងទឹកស្ទឹងប្រវត្តិសាស្ត្រសៀមរាប ភូមិសាស្ត្រភូមិប្រិយ ឃុំខ្នាសណ្តាយ ស្រុកបន្ទាយស្រី ជាប់ព្រំប្រទល់ឃុំពាក់ស្នែង ស្រុកអង្គរធំ ។ ដោយឡែកនៅដើមឆ្នាំ២០១៣ នេះ គឺអំពើឃាតកម្មអាកជនរងគ្រោះពីរនាក់បងប្អូននៅស្រុកជីក្រែងនេះតែម្តង ៕
0 comments:
Post a Comment