ធ្វើឱ្យភ្នែកស្រស់ស្អាតមានមន្ដស្នេហ៍ តាមរយៈការចាក់ថ្នាំ ប្រើវីតាមីន C និងការបណ្ដុះរោមភ្នែក ~ Khmer- News For You
ភ្នែកជាចក្ខុវិញ្ញាណ ជាដួងកែវនៃជីវិត សំរាប់បង្ហាញផ្លូវរបស់យើង ប៉ុន្ដែតើអ្វីទៅដែលធ្វើឱ្យភ្នែកយើងស្រស់ស្អាត និងទាក់ទាញជាងភ្នែករបស់អ្នកដទៃ? ភ្នែកស្រស់ស្អាត គឺជាភ្នែកធំៗ មានរោមភ្នែកវែងៗ និងជុំវិញបរិវេណភ្នែកមានលក្ខណៈស្រទន់ មិនមានស្នាមជ្រីវជ្រួញ។ សម្រាប់យើងដែលមានភ្នែកស្រស់ស្អាត ហើយពេលវេលាក៏ធ្វើឱ្យភ្នែកយើងផ្លាស់ប្ដូរផងដែរ។ ដូច្នេះតើត្រូវថែរក្សាភ្នែករបស់យើងឱ្យនៅតែមានមន្ដស្នេហ៍ និងទាក់ទាញដោយរបៀបណា? ស្បែកនៅជុំវិញរង្វង់ភ្នែក គឺមានលក្ខណៈស្ដើងហើយខ្ចី ដូច្នេះត្រង់បរិវេណនេះ ជាសញ្ញាដំបូងបង្អស់ បង្ហាញឱ្យដឹងពីវ័យចំណាស់របស់អ្នក។ មនុស្សយើងទទួលរងភាពចាស់ នៅលើរង្វង់ភ្នែកមាន ២ ទំរង់ធំៗ គឺតាមរយៈស្នាមខ្មៅ ឬស្នាមជ្រីវជ្រួញ។ ការញញឹមញញែម ការចងចិញ្ចើម ការធ្មេចភ្នែក និងការទំពារ ជាចលនាមូលដ្ឋានលើផ្ទៃមុខ ដែលបន្ដិចម្ដងៗ អាចនាំទៅរកភាពសាមញ្ញបំផុតនៃសញ្ញាបង្ហាញ តាមរយៈអាការៈស្នាមជ្រីវជ្រួញថា អ្នកមានវ័យចាស់។ ស្នាមជ្រីវជ្រួញ អាចមានមកជាមួយការហើមប៉ោង និងធ្លាក់ថ្នក់ខាងក្រោមភ្នែក។ អាការៈទាំងនេះ អាចឱ្យគេមើលទៅអ្នកហាក់បីដូចជាហត់នឿយ ឬដូចជាមុខកំពុងខឹង បើទុកណាជាអ្នកមិនមានអារម្មណ៍បែបនេះក៏ដោយ។ នៅពេលយើងវិវដ្ដទៅរកវ័យចាស់ ស្បែកនៅជុំវិញប្រឡង់ភ្នែកមានសភាពជ្រីវជ្រួញ ដែលហៅថា ភាពជ្រួញត្រង់កន្ទុយភ្នែក។ វិធីបង្ការ ៖ យើងអាចបង្ការស្នាមជ្រីវជ្រួញ ដោយកាត់បន្ថយកុំឱ្យត្រូវកំដៅព្រះអាទិត្យ និងចៀសវាងការជក់បារី ឬញ៉ាំជាតិស្រវឹងច្រើនពេក។ នៅពេលអ្នកខ្លះ កើតមានអាការជ្រីវជ្រួញ ឬស្នាមជាំខ្មៅ ក៏អាចបណ្ដាលមកពីកត្ដាបរិស្ថានផ្សេងៗ ផងដែរ។ ចូរញ៉ាំអាហារណាដែលនាំមកនូវសុខភាពល្អ និងញ៉ាំទឹកឱ្យបានច្រើន ដើម្បីជួយធ្វើឱ្យស្បែកស្រស់ថ្លា និងកុំឱ្យខ្សោះជាតិទឹក។ ការព្យាបាល ៖ តំណាក់កាលទី ១ ការចាក់ បូថកស៍-BotoxR : ទម្រង់គ្រឿងសម្អាង ដែលមានសារធាតុ Botulinum Toxin (ជាប្រូតេអ៊ីនដែលផលិតដោយអតិសុខុមប្រាណ) ដែលគេស្គាល់ថា បូថកស៍ (BotoxR) គឺជាថ្នាំចាក់ដ៏ពេញនិយម ដោយមិនចាំបាច់ធ្វើការវះកាត់ ដែលអាចកាត់បន្ថយ ឬបំបាត់ជាបណ្ដោះអាសន្ននូវស្នាមជ្រួញ ដោយការចងចិញ្ចើមនៅលើថ្ងាស កន្ទុយភ្នែក និងនៅត្រង់.ក។ ដូច្នេះឱសថនេះ អាចជួយធ្វើឱ្យស្បែកម៉ដ្ឋរលោងស្អាត និងស្រស់ថ្លាឡើងវិញ។ សារធាតុ Toxin នេះទៅទប់ឃាំងសន្ទុះសរសៃប្រសាទ បង្អាក់សាច់ដុំដែលបង្ករឱ្យជ្រីវជ្រួញបណ្ដោះអាសន្ន ព្រមទាំងធ្វើឱ្យស្បែកម៉ត់រលោង និងមានសម្រស់ស្រស់ស្រាយ។ សារធាតុនេះអាចលាយ ផ្សំជាមួយនឹងវិធីសាស្ដ្រថែរក្សាស្បែក ដោយគ្រឿងសម្អាងដទៃទៀតដូចជា.. ការបកស្បែក ការចាក់បំពេញសាច់ (ឌឺមា ហ្វីលល័រ) –Dermal Filler ឬម៉ាស្សាមុខយកកោសិកាចាស់ចេញ ដោយម៉ាស៊ីន Microdermabrasion ដើម្បីទទួលបានលទ្ធផលល្អ។ វិធីសាស្ដ្រព្យាបាលដោយការបញ្ចូលគ្នារបៀបនេះ កាន់តែអាចជួយការពារមិនឱ្យកើតស្នាមជ្រីវជ្រួញថ្មីៗទៀត នៅពីលើស្បែក។ តំណាក់កាលទី ២ ការចាក់បំពេញសាច់(ឌឺមា ហ្វីលល័រ) –Dermal Filler : ប្រសិនបើអ្នកចង់កាត់បន្ថយស្នាមជ្រីវជ្រួញនៅលើផ្ទៃមុខ សារធាតុ Hyaluronic អាចជាជម្រើសដ៏ប្រសើរ ដូចការចាក់បំពេញសាច់ (ឌឺមា ហ្វីលល័រ) ដែរ ដោយសារតែប្រសិទ្ធិភាពសមប្រកប ជាមួយរូបកាយមនុស្ស។ Hyaluronic Acid គឺជាសារធាតុធម្មជាតិរកឃើញ នៅក្នុងសរីរាងកាយមនុស្ស។ ការប្រមូលផ្ដុំសារធាតុនេះច្រើន ត្រូវបានគេប្រទះឃើញនៅក្នុងជាលិកា ដែលមានទំនាក់ទំនងគ្នា និងនៅក្នុងវត្ថុរាវជុំវិញភ្នែករបស់អ្នក។ ឥឡូវសារធាតុនេះ បានក្លាយទៅជាប្រភេទចាក់បំពេញសាច់ (ហ្វីលល័រ) Filler ដ៏ពេញនិយមបំផុត ដែលអាចចាក់ (injection) បាន។ ស្លាកសញ្ញាទីផ្សារឱសថកែសម្ផស្សនេះ មានដូចជាឈ្មោះ Captique, Esthélis, Elevess, Hylaform, Juvéderm, Perlane, Prevelle, Puragen និង Restylane។ នៅពេលជែល (gel) នេះត្រូវចាក់បញ្ចូលទៅក្នុងសាច់ វាមានតួនាទីជួយបំពេញជាលិកាផ្ទៃមុខ ដែលចាស់ទ្រុឌទ្រោម និងបាត់បង់ ដោយសារវ័យចាស់តាមធម្មជាតិ ឱ្យវិលមករកប្រក្រតីភាពដូចដើមវិញ។ ជាងនេះទៅទៀត វាក៏នាំមកនូវជាតិទឹក ដើម្បីជួយផ្ដល់សំណើមដល់ស្បែក និងធ្វើឱ្យស្បែកទន់រលោងស្រស់ថ្លា។ វីតាមីន C ៖ វីតាមីន C មានប្រសិទ្ធិភាពជួយកម្ចាត់ស្នាមខ្មៅជាំ នៅក្រោមរង្វង់ភ្នែក។ វីតាមីន C ជួយបង្កើនខូឡាជេន Collagen បំបាត់រ៉ាឌីកាល់សេរី ដែលកើតនៅលើស្បែក និងការពារស្បែកប្រឆាំងនឹងការបំផ្លាញ ដោយសារកម្ដៅព្រះអាទិត្យ។ រាល់សារជាតិទាំងនេះ សុទ្ធតែអាចជួយកាត់បន្ថយស្នាមខ្មៅ នៅត្រង់រង្វង់ភ្នែកបាន។ ទោះជាយ៉ាងនេះក្ដី ជាការសំខាន់ គឺត្រូវកត់សម្គាល់ឱ្យឃើញថា វីតាមីន C មិនសូវស្ថិតស្ថេរប៉ុន្មានទេ។ មានន័យថា នៅពេលប៉ះពាល់ត្រូវខ្យល់ វានឹងធ្វើប្រតិកម្មរំហួតទៅតាមខ្យល់ ហើយមិនមានប្រសិទ្ធភាព និងបង្កើតឱ្យមានស្នាមជ្រីវជ្រួញ ជាជាងកម្ចាត់ចោលស្បែកខូច។ ដូចនេះ ឧបករណ៍វេជ្ជសាស្ដ្រដូចជាម៉ាស៊ីន Iontophoresis ត្រូវបានបង្កើតឡើង ដើម្បីប្រើប្រាស់ Microcirculation ប្រយោជន៍ដើម្បីចាក់បញ្ចូលវីតាមីន C ទៅក្នុងកោសិកា។ ការបណ្ដុះរោមភ្នែក : ផលិតផល Latisse (bimatoprost ophthalmic solution) គឺជា prostaglandin analog (ជាសមាជិកនៃលីពីត ដែលកើតមកពីអាស៊ីដខ្លាញ់) ដើម្បីធ្វើឱ្យរោមភ្នែកកាន់តែវែងក្រាស់ និងខ្មៅជាងមុន ដោយពន្លូតប្រវែង កម្រាស់ និងពណ៌ខ្មៅ។ លាបវានៅលើស្បែកត្រង់ត្របកភ្នែកខាងលើជ្រៅបន្ដិច រៀងរាល់យប់រយៈពេល ៨ សប្តាហ៍ អ្នកនឹងទទួលលទ្ធផល ជាក់ជាមិនខានឡើយ។ ភ្នែកមានមន្ដស្នេហ៍ មិនទាន់គ្រប់គ្រាន់នៅឡើយទេ សម្រាប់ធ្វើឱ្យសម្រស់រូបរាងកាយរបស់អ្នក ស្រស់ស្អាតឥតទាស់ត្រង់ណានោះ។ ដូច្នេះត្រូវរកវិធីសាស្ដ្រកែកុនសោភ័ណភាពបន្ថែមទៀត ដើម្បីធ្វើឱ្យខ្លួនអ្នកនៅតែក្មេងជានិច្ច៕ ដោយ៖ ស្រីពេជ្រ (o_O)
0 comments:
Post a Comment