ខេត្តកំពង់ចាម ៖ ផ្លូវលំក្រាលគ្រួសក្រហម ១ខ្សែ ប្រវែង ១២គីឡូម៉ែត្រ ពីចំណុចផ្សារអូររាំងឪ ទៅភូមិដំណាក់ព្រីង ស្រុកកោះសូទិន ត្រូវបានប្រារព្ធបើកការដ្ឋានជួសជុលឡើងវិញ នៅព្រឹកថ្ងៃទី២១ មិថុនា ២០១៣ក្រោមអធិបតីភាព លោក ជា សុផារ៉ា រដ្ឋមន្រ្តីក្រសួងអភិវឌ្ឍន៏ជនបទ ស្ថិតនៅក្នុងបរិវេណវត្តស្វាយមីងឃុំអំពិលតាពក ស្រុកអូររាំងឪ ។
វត្តមានភ្ញៀវកិត្តិយសដែលបានអញ្ចើញចូលរួមមាន លោក ឡាន់ ឆន ប្រធានក្រុមប្រឹក្សាខេត្ត លោកស្រី ខុង ស៊ុនអេង អភិបាលរងខេត្ត លោក សាយ សំអាល់ ប្រធានក្រុមការងារចុះជួយស្រុកអូររាំងឪ លោកជំទាវ សាន្ត អរុណ អនុប្រធានក្រុមការងារចុះជួយស្រុកអូររាំងឪ លោកជំទាវឧកញ៉ា យិន សុផានី អនុប្រធានក្រុមការងារចុះជួយស្រុកអូររាំងឪ លោកឧកញ៉ា ប៉ូ គឹមថេង ព្រមទាំងសមាជិក សមាជិកាបក្ស ប្រជាពលរដ្ឋចូលចំនួនជាង ៤.០០០ នាក់ ។
លោក រស់ សុខន អភិបាលស្រុកអូររាំងឪ ថ្លែងគូសបញ្ជាក់ថា ស្រុកអូររាំងឪ មានឃុំចំនួន៧ ភូមិ១៤១ ផ្ទៃដី ៣១.៨៤៦ ហិកតា គិតត្រឹមចុងឆ្នាំ២០១២ មានប្រជាពលរដ្ឋចំនួន ៩៤.២៤៩នាក់ ស្រី ៤៨.៦៥១នាក់ ដង់ស៊ីតេស្មើ ២៩៥,៩៤នាក់ ក្នុង ១គីឡូម៉ែត្រការ៉េ ។ លោកបន្តថា សម្រាប់បញ្ហាសនិ្តសុខ គឺស្ថិតក្នុងស្ថានភាពមធ្យម ដូចជាការងារភូមិឃុំមានសុវត្ថិភាពក្នុងឆ្នាំ២០១២ កន្លងមកមាន ២ឃុំ ជាប់លេខ១ ១ឃុំ ជាប់លេខ២ ២ឃុំ ជាប់លេខ៣ និង ២ឃុំ ទៀតមិនជាប់ចំណាត់ថ្នាក់ ។
រីឯហេដ្ឋារចនាសម្ព័ន្ធនានាមាន ទំនប់ ៤៨កន្លែង ប្រឡាយ ២១ ខ្សែ វិទ្យាល័យ៣ អនុវិទ្យាល័យ៤ បឋមសិក្សា៣៦ ថ្នាក់មត្តេយ្យរដ្ឋ៧ មត្តេយ្យសហគមន៏៧ ការិយាល័យសុខាភិបាលស្រុក១ មណ្ឌលសុខភាព៨ វត្ត២៥ ពុទ្ធិកអនុវិទ្យាល័យ១ ពុទ្ធិកបឋមសិក្សា៤ សាលាធម្មវិន័យ ១ថ្នាក់ វិហារគ្រឹស្ទ២ ស្នាក់ការគ្រឹស្ទ៥ ផ្សារខ្នាតធំ១ ផ្សារខ្នាតតូច១ ស្ថានីយ៏ប្រេងឥន្ធនៈ៣ ស្ថានីយ៏ចែកចាយអគ្គិសនី១ ផ្ទះសំណាក់២ អាហារដ្ឋាន ១២កន្លែង រោងចក្រកាត់ដេរ១ គ្រឹះស្ថានផ្តល់ប្រាក់កម្ចី៨ ស្ថានីយ៏ទឹកស្អាត១ សិប្បកម្មទឹកត្រីខ្នាតតូច១ ស្ថានីយ៏ទូរទស្សន៍ខ្សែកាប១ អង្កការចំនួន៩ កំពុងធ្វើសកម្មភាព សាលាខ្មែរ-ចិន១ និងសាលារៀនអង់គ្លេសឯកជន១ ។
ជាក់ស្តែងនៅឆ្នាំ២០១៣ នេះ គម្រោង៩ ដែលត្រូវអនុវត្តន៏ក្នុងឃុំទាំង៧មានគម្រោងជួសជុលផ្លូវក្រាលគ្រួសក្រហម ប្រវែង ១៧.២៨១ ម៉ែត្រ គម្រោងសាងសង់លូ ១១កន្លែង គម្រោងកែលម្អផ្លូវបេតុង ៣៤២ម៉ែត្រ និងគម្រោងស្តារប្រឡាយប្រវែង ១.៣៥០ ម៉ែត្រ ដែលទើបបញ្ចប់ការដេញថ្លៃ កាលពីថ្ងៃទី២០ មិថុនា ២០១៣ ។
បន្ទាប់មក លោក ជា សុផារ៉ា រដ្ឋមន្រ្តីក្រសួងអភិវឌ្ឍន៏ជនបទ មានប្រសាសន៏ឲ្យដឹងដែរថា ក្នុងពេលដែលប្រទេសកម្ពុជា ធ្លាក់ក្នុងរបបប៉ុលពតនោះ មានមេបក្សប្រឆាំងមួយចំនួនរស់នៅប្រទេសបារាំង ដែលប្រជាជនគ្រប់រូបកំពុងរស់នៅក្នុងភាពវេទនាបំផុត សូម្បីតែរូបលោកផ្ទាល់ក៏ត្រូវបានគេបង្ខំឲ្យធ្វើការជីកដីជាទម្ងន់តាមផែនការដែលអង្កការបានដាក់ឲ្យ ។
លុះពេលដែលកម្ពុជាយើងបានរំដោះចេញពីរបបនេះមក នៅឆ្នាំ១៩៩៣ ដែលមានការរៀបចំបោះឆ្នោតជាលើកដំបូងត្រូវបានរៀបចំឡើងដោយអង្កការសហប្រជាជាតិ ។ ផ្អែកតាមរយៈការបោះឆ្នោតជ្រើសរើសតំណាងរាស្រ្តចំនួន ៤អាណត្តិ និងបោះឆ្នោតក្រុមប្រឹក្សាឃុំ-សង្កាត់ ចំនួន ៣លើក កន្លងមកក្តី បក្សប្រឆាំងនៅតែចាញ់ឆ្នោត ក្រុមប្រឆាំងគេដើរបោកជាមួយនឹងអ្នកផ្សេងបាន តែជាមួយនឹងគណបក្សប្រជាជនកម្ពុជា គឺមិនអាចបោកបាននោះទេ ។
ជាក់ស្តែងតាមការពិនិត្យគ្រាន់តែនៅឃុំអំពិលតាពក មានប្រជាជនចំនួន ១.៦២០នាក់ មិនបានទៅបោះឆ្នោតក្រុមប្រឹក្សាឃុំ-សង្កាត់ ហើយអ្នកដែលធ្លាប់តែបោះឆ្នោតឲ្យបក្សផ្សេងសូមបង្វិលងាកបោះឲ្យគណបក្សប្រជាជនកម្ពុជាវិញ នាថ្ងៃទី២៨ កក្កដា ខាងមុខ នឹងទទួលបានផ្លូវថ្នល់ សាលារៀន វត្តអារាម និងសមិទ្ធិផលផ្សេងៗទៀត ចាប់តាំងក្រោយឆ្នាំ១៩៧៩ រហូតមកដល់សព្វថ្ងៃនេះ យើងទទួលបានសុខសាន្តរយៈពេល ៣៥ឆ្នាំ មកហើយ និងជួយបង្កើនជីវភាពរបស់ប្រជាជនឲ្យទទួលបានការរីកចម្រើន ។ គាំទ្របេក្ខភាព សម្តេចតេជោ ហ៊ុន សែន ជានាយករដ្ឋមន្រ្តីនៅអាណត្តិទី៥ នេះ គោលនយោបាយរបស់គណបក្សប្រជាជន គឺមិនយកពន្ធលើដីធ្លីនោះទេ ។
សូមបញ្ជាក់ថា ក្រោយពីបញ្ចប់ពិធីខាងលើ លោក ជា សុផារ៉ា បានអញ្ជើញទៅសំណេះសំណាលជាមួយនិងប្រជាជនចំនួន ៤.៤០០នាក់ នៅវត្តថ្មីលើ ឃុំព្រះធាតុ រហូតដល់ពេលរសៀលថ្ងៃដដែល (២១ មិថុនា) សំណេះសំណាលជាមួយប្រជាជននៅក្នុងបរិវេណសាលាបឋមសិក្សា ញឹម វណ្ណដា ឃុំគងជ័យ ចំនួនជាង ៦.០០០នាក់ មកពីឃុំគងជ័យ និងឃុំទួលសុភី និងសំណេះសំណាលនៅក្នុងវិទ្យាល័យ ហេង សំរិន ប្រជាជនមកពីឃុំចក និងឃុំដំរិល ចំនួនជាង ៦.០០០នាក់ ផងដែរ ដោយសំណូមពរឲ្យប្រជាពលរដ្ឋបោះឆ្នោតជូនគណបក្សប្រជាជនកម្ពុជា ស្ថិតនៅលំដាប់លេខរៀងទី៤ ។ នាឱកាសនោះ ក៏បានចែកសារុងម្នាក់មួយៗ ដល់ប្រជាជនដែលបានចូលក្នុងក្តីសោមនស្សរីករាយក្រៃលែង ៕
0 comments:
Post a Comment